कोहलपुर चैत २१- हात्तीले आक्रमण गर्दा बाँके राष्ट्रिय निकुञ्जका एक कर्मचारीको मृत्यु भएको छ। निकुञ्ज कार्यालयका प्रमुख, वरिष्ठ संरक्षण अधिकृत बीरेन्द्र कँडेलका अनुसार बर्दिया ठाकुरबाबा नगरपालिका–९ निवासी अन्दाजी ४५ वर्षका आशाराम थारुको घटना स्थलमै मृत्यु भएको हो।

बाँके राष्ट्रिय निकुञ्ज अन्तर्गत कोहलपुर नगरपालिकाको खड्वार हात्तीसारमा बुधबार राति ८ः३० बजेतिर घाँस, दाना हाल्ने क्रममा १८ वर्षको गणेशगज (भाले हात्ती) ले उनलाई आक्रमण गरेको थियो। ‘हात्तीले पहिला सुँढले हानेर त्यसपछि किचेर मार्यो,’ प्रमुख कँडेलले भने। कार्यालयका अनुसार थारुले २०७३ सालदेखि खड्गवारमा उक्त हात्तीको स्याहार गर्न थालेका हुन्।

उनी निकुञ्जको ‘फणित’ पदमा कार्यरत थिए। बाँकेमा २०७३ सालमा यिनै थारुले गणेशगजलाई बर्दियाबाट ल्याएर आएका हुन्। ‘हात्तीलाई मात चढ्यो भने आक्रमण गर्छ, केही दिनदेखि हात्तीको मात चढेको संकेत देखिरहेको थियो,’ प्रमुख कँडेलले भने, ‘मात चढेपछि रिसाउने र आक्रमण गर्ने सम्भावना हुन्छ।’

सोही हात्तीले २०७९ सालमा पनि कृष्ण उपाध्यायलाई हानेर घाइते बनाएको थियो। यस्तै अर्को पोथी हात्तीको माउतेलाई पनि उक्त हात्तीले आक्रमण प्रयास गरेको निकुञ्जले जनाएको छ। हात्तीको आक्रमणबाट मृत्यु भएका थारुको शव नेपालगन्ज मेडिकल कलेज शिक्षण अस्पताल कोहलपुरमा राखिएको प्रहरीले जनाएको छ।

उनको शव पोष्टमार्टम पश्चात परिवारलाई बुझाउने तयारी छ। आक्रमणमा संलग्न हात्तीलाई अहिले नियन्त्रणमा राखिएको छ। ‘हात्तीमा मात चढेको हुँदा यसलाई कन्ट्रोल गरेर मात्रै राख्न सक्छौं,’ प्रमुख कँडेलले भने।

बाँके राष्ट्रिय निकुञ्जमा ६ वटा हात्ती रहेका छन्। निकुञ्जको खड्गवार, बुच्चापुर र गोबारपुर हात्तीसारमा २/२ वटाका दरले कुल ६ वटा हात्तीको स्याहार गर्दै आएको कार्यालयले जनाएको छ। खड्गवार हात्तीसारमा २ वटा हात्ती स्याहार गर्न माउते, फनितसहित ८ जना, बुच्चापुरमा ७ जना र गोवारपुरमा ६ कर्मचारीको व्यवस्थापन गरिएको छ।