कोहलपुर पुस १९- समाज रुपान्तरणका लागि दलित समाजको पहल निकै प्रभावकारी रूपमा अघि बढिरहेको छ । “समाज रुपान्तरणका लागि हाम्रो अभियान” भन्ने मुल नारासँगै दलित समाजले आफ्नो प्रयासलाई बलियो बनाउन १२ महिने निशुल्क कम्प्युटर तालिमको कार्यक्रम सुरु गरेको छ । यस कार्यक्रम अन्तर्गत हालै दुईजना व्यक्तिले यो तालिम सफलता पूर्वक पूरा गरेका छन् ।

कोहलपुर नगरपालिका वडा नम्बर १२ का हिरा देवी विक र चन्द्रकला विकले यस तालिममा उत्तीर्ण भएर एक नयाँ उपलब्धि हासिल गरेका छन् । यी दुवै महिलाले सशक्त सामाजिक परिवर्तनको लागि प्राविधिक ज्ञानलाई अपनाएर, दलित समाजको समृद्धिका लागि आफ्नो योगदान प्रस्तुत गर्ने प्रतिवद्धता व्यक्त गरेका छन् ।

दलित समाजको ‘सेवा एकता’ अभियानले समाजका निम्न वर्गका सदस्यहरुलाई व्यावसायिक तालिम दिने उद्देश्य राख्दै १२ महिने कम्प्युटर तालिमको आयोजना गरेको हो । यस तालिममार्फत सहभागीहरुलाई कम्प्युटरका विभिन्न आधारभूत पक्षहरू, इन्टरनेट र सफ्टवेयर प्रयोग, डाटा व्यवस्थापन र अन्य डिजिटल सीपहरूको ज्ञान दिने भएको छ । यसले उनीहरूको आत्मनिर्भरता बढाउन र आर्थिक अवस्थामा सुधार ल्याउन महत्वपूर्ण भूमिका खेल्ने अपेक्षा गरिएको छ ।

‘सेवा एकता’ अभियानका अध्यक्ष धनसिंह लुहारले, यो कार्यक्रम दलित समाजका महिला र पुरुषको डिजिटल साक्षरता बढाउने उद्देश्यले चलाइएको जानकारी दिए । उनले भने, ” समाज रुपान्तरणका लागि डिजिटल सीप अनिवार्य छ । यो तालिमका माध्यमबाट हामीले नयाँ पुस्तालाई प्राविधिक ज्ञानमा दक्ष बनाउँदै उनीहरूको भविष्य उज्जवल बनाउन मद्दत गर्ने छौं ।

यो कदम दलित समाजका लागि एक प्रेरणाको स्रोत बन्ने छ । कम्प्युटर र प्रविधिका क्षेत्रमा दक्षता हासिल गर्ने माध्यमबाट, यिनका जीवनमा मात्रै परिवर्तन आउने छैन, समाजमा एक नयाँ दृष्टिकोण र सम्भावनाको ढोका खोल्ने काम पनि हुनेछ ।

समाज रुपान्तरणका लागि यस्तो पहल र कार्यक्रमले केवल सन्देश मात्र नभई, नयाँ सोच र हिम्मतको प्रवाह गर्नेछ, जसले समाजका हरेक वर्गलाई समान अवसर र अधिकारमा पहुँच पुर्याउने सपना पुरा गर्ने बाटोमा डोर्याउँछ ।