काठमाडौँ, मंसिर २० – नेकपा (माओवादी केन्द्र)ले हालै सम्पन्न पालिका उपचुनावका परिणामलाई उत्साहजनक भन्दै आगामी चुनावमा एक्लै प्रतिस्पर्धा गर्ने आधार तयार भएको निष्कर्ष निकालेको छ। पार्टी अध्यक्ष पुष्पकमल दाहाल ‘प्रचण्ड’को निवास खुमलटारमा भएको केन्द्रीय कार्यालयको बैठकले यस परिणामलाई सकारात्मक रुपमा लिएको हो।

बैठकपछि माओवादी केन्द्रका प्रवक्ता अग्निप्रसाद सापकोटाले, “जितेका सिट संख्या र प्राप्त जनमत दुवै हिसाबले पार्टीका लागि उत्साहजनक नतिजा आएको छ,” भने। माओवादीले रुकुमपूर्वको पुथाउत्तरगङ्गा र हुम्लाको सर्केगाड गाउँपालिकामा जित हासिल गर्दा अन्य पालिका र वडामा पनि महत्वपूर्ण सुधार गरेको दाबी गरेको छ। यसले पार्टीलाई आगामी चुनावमा आफ्नो स्वतन्त्र पहिचान र एजेण्डासहित प्रतिस्पर्धा गर्ने आधार तयार गरेको माओवादीको निष्कर्ष रहेको प्रवक्ता सापकोटाले जनाए।

यसअघिका परिणामका आधारमा माओवादीले रुकुमपूर्वको पुथाउत्तरगङ्गा गाउँपालिकामा भारी मत अन्तरले जित हासिल गरेको, त्यहाँको वडामा निर्विरोध विजय प्राप्त गरेको र अन्य स्थानहरूमा पनि राम्रो मत प्राप्त गरेको उल्लेख गरेको छ। जाजरकोटको नलगाड नगरपालिका, मोरङको ग्रामथान गाउँपालिका, नुवाकोट, गोरखा, धनुषा, डोल्पा लगायतका स्थानमा माओवादीले महत्वपूर्ण विजय प्राप्त गरेको छ।

यस परिणामलाई नागरिकमा माओवादीप्रति बढेको विश्वास र उत्साहको रूपमा लिइएको छ। तर, माओवादीले नागरिकसँगको सम्बन्ध अझ प्रगाढ बनाउन नसकेको र त्यसलाई पार्टीको कमजोरीको रूपमा लिएको छ। यसैले पार्टीले आफ्नो आधारवर्ती वर्गसँग पुनः जोडिन र संवादमा सुधार गर्न अभियान शुरु गरेको छ।

बैठकले पार्टीका पालिका सम्मेलन र पालिकास्तरका खबरदारी सभाहरूलाई प्रभावकारी बनाउनुपर्ने निर्णय पनि गरेको छ।