कोहलपुर , मङ्सिर १३ – बाँके जिल्लाको ग्रामीण क्षेत्रमा मोतियाबिन्दु रोगका बिरामीहरूको संख्या बढ्दै गएको पाइएको छ । जिल्लाका विभिन्न स्थानमा आयोजित निःशुल्क आँखा जाँच शिविरमा अधिकांश बिरामीहरूमा मोतियाबिन्दुको समस्या देखा परेको छ ।

फत्तेबाल आँखा अस्पताल नेपालगन्जका अनुसार, खजुरा गाउँपालिकामा ९ देखि १२ मङ्सिरसम्म सञ्चालन गरिएको निःशुल्क आँखा परीक्षण शिविरमा २६८ जनामा मोतियाबिन्दु देखिएको हो । यस शिविरमा कुल १,३१४ जनाको आँखा परीक्षण गरिएको थियो, जसमा २६८ जनालाई मोतियाबिन्दुको समस्या पाइएको छ । यी सबै बिरामीहरूलाई निःशुल्क शल्यक्रिया उपचारका लागि नेपालगन्जस्थित फत्तेबाल आँखा अस्पतालमा रिफर गरिएको छ ।

फत्तेबाल आँखा अस्पतालका कार्यक्रम अधिकृत उमेर अहमद सादिकले यस बारेमा जानकारी दिँदै भने, “सम्पूर्ण खजुरा गाउँपालिकामा आयोजित आँखा शिविरमा धेरै व्यक्तिहरूमा मोतियाबिन्दुको समस्या देखिएको छ, जसको उपचारका लागि उनीहरूलाई अस्पतालमा पठाइएको छ । उहाँले भने, “पछिल्लो समय बाँके जिल्लाका विभिन्न स्थानमा मोतियाबिन्दुका बिरामीहरूको संख्या बढ्दो छ, र यसले समुदायमा आँखा स्वास्थ्यको महत्त्वबारे सचेतना फैलाउने आवश्यकता बढाएको छ ।

सादिकले यस बीच, मङ्सिर १४ देखि १८ सम्म बर्दिया जिल्लाको राजापुर नगरपालिकामा पनि निःशुल्क आँखा परीक्षण शिविर आयोजना गरिने जानकारी दिनुभयो । राजापुरका सर्वसाधारणलाई आआफ्नो आँखा परीक्षण गराउन शिविरमा सहभागी हुन अपील गर्दै उहाँले भने, “यो अवसरलाई नछुटाउनुहोस् र निःशुल्क आँखा परीक्षण गराएर आफ्नो आँखा स्वास्थ्यको बारेमा जानकारी लिनुहोस् ।

आँखा स्वास्थ्य सम्बन्धी सचेतना फैलाउने र समयमै उपचार गराउने उद्देश्यले गरिएको यस प्रकारका शिविरहरूले स्थानीय समुदायमा ठूलो प्रभाव पार्ने अपेक्षा गरिएको छ ।