दाङ, असोज ४ – लुम्बिनी प्रदेशका मुख्यमन्त्री चेतनारायण आचार्यले नागरिकको बढ्दो आकांक्षालाई सम्बोधन गर्न राजनीतिक दलहरूबीच दरिलो एकता, समन्वय र सहकार्यको आवश्यकता औँल्याउनुभएको छ।

संविधान तथा राष्ट्रिय दिवस–२०८१ को अवसरमा बिहीबार राप्ती उपत्यका देउखुरीमा भएको समारोहमा मुख्यमन्त्री आचार्यले ‘समृद्ध लुम्बिनी, आत्मनिर्भर प्रदेश’ को नारालाई साकार बनाउन सबै सरोकारवालाले जिम्मेवारीका साथ काम गर्नुपर्ने बताउनुभयो। उहाँले योजनाबद्ध विकासमा लुम्बिनी प्रदेशको अग्रणी स्थानको चर्चा गर्दै भन्नुभयो, “प्रदेशको समृद्धि र स्थायित्वका लागि दलहरूको बीचमा एकता आवश्यक छ। समृद्ध प्रदेश र सुखी जनताको लक्ष्य हासिल गर्न हामी सबैको संलग्नता आवश्यक छ।”

मुख्यमन्त्रीले दीर्घकालीन लक्ष्य निर्धारण गरेर विकासका योजनाहरूलाई प्राथमिकता दिइएको जानकारी दिनुभयो। नयाँ राजधानी व्यवस्थापन, प्रदेश गौरवका आयोजना सम्पन्नता र जनशक्तिको उचित व्यवस्थापनका लागि आवश्यक कानूनी संशोधनमा सरकार अग्रसर रहेको बताउनुभयो।

प्रदेशलाई सुशासन र प्रविधिमैत्री बनाउन नागरिकलाई प्रभावकारी सेवा उपलब्ध गराउने कार्यमा पनि सरकार लागिपरेको छ। उहाँले भ्रष्टाचारमुक्त प्रदेश बनाउन र नागरिकका गुनासालाई समयमै सम्बोधन गर्न सरकार क्रियाशील रहेको दाबी गर्नुभयो।

कार्यक्रममा लुम्बिनी प्रदेशका सभामुख तुलाराम घर्तीमगरले संविधानका अधिकार कार्यान्वयनका लागि तीन तहका सरकारबीच समन्वय र सहकार्यको महत्त्वलाई जोड्नुभयो। नेकपा (माओवादी केन्द्र) का नेता जोखबहादुर महराले संविधानको पूर्ण कार्यान्वयनमा सबै दल एकजुट हुनुपर्ने आवश्यकताको उल्लेख गर्नुभयो।

नेपाली कांग्रेसका संसदीय दलका नेता डिल्लीबहादुर चौधरीले संविधानको मूल मर्म सङ्घीयता र एकता भएको बताउँदै सहरी विकास तथा खानेपानी मन्त्री सरोज थापाले प्रदेशले कानूनी आधार तयार गरिसकेको र अब विकासलाई नागरिकसम्म पुर्याउन सरकार प्रतिबद्ध रहेको जानकारी दिनुभयो।

झाँकी र प्रभातफेरीको उत्सव

संविधान दिवसको अवसरमा विभिन्न समुदायका कला संस्कृति झल्काउने झाँकी प्रदर्शनी गरिएको थियो। मगर, थारू, नेवार र ब्राह्मण जस्ता समुदायहरूले झाँकी प्रदर्शन गरेका थिए। यसैबीच, लुम्बिनी प्रदेश सरकारले रक्तदान र निःशुल्क स्वास्थ्य परीक्षण शिविरको आयोजना पनि गरेको थियो।

राजधानी परिसरमा भएको स्वास्थ्य शिविरमा मुख्यमन्त्री आचार्य, भौतिक पूर्वाधार विकास मन्त्री भूमिश्वर ढकाल र स्वास्थ्य मन्त्री खेमबहादुर सारूमगरले स्वास्थ्य परीक्षण गराएका थिए। यसै अवसरमा प्रदेशका १२ जिल्लाका अस्पतालहरूमा निःशुल्क ल्याब परीक्षण र ओपीडी शुल्क पनि निःशुल्क गरिएको थियो।