रोल्पा, १८ माघ ।

रोल्पामा एक बृद्धको हत्या गरिएको छ । अज्ञात समूहले रोल्पाको परिवर्तन गाउँपालिका ६ भनभने गाउँमा बिहीबार राति करिब १० बजेतिर ७२ वर्षीय बलिराम बुढाको हत्या गरेको प्रहरीले बताएको छ । बुढाको हत्या गरि धनमाल लुटपात गरेको रोल्पा प्रहरी प्रमुख डिएसी चित्रबहादुर गुरुङले जानकारी दिए ।

बिहीबार राति घटना भएपनि शुक्रबार बेलुकी मात्र गाउँलेले थाहा पाएका थिए । बुढाबुढी मात्र रहेको उक्त घरमा ६ जना पुरुष र १ महिला गरी ७ जनाले हत्या र लुटपाट गरेको मृतक बलिराम बुढाकी श्रीमती ७० वर्षीया कउली बुढाले जानकारी दिईन् ।

१६ माघको राति १० बजेतिर हातखुट्टा बाँधेर मुखमा कपडा कोचेर पल्टाइएका बृद्धको मृत्यु भएको र १७ माघको बेलुका ८ बजेतिर घरमा बत्ती नबलेपछि छिमेकी हेर्न जाँदा बृद्धा पनि बाँधिएकै अवस्थामा अचेत भेटिएको छिमेकीले जानकारी दिए ।

शनिबार बिहान घटनास्थल पुगेको प्रहरीले आवश्यक मुचुल्का उठाई पोस्टमार्टमका लागि बुढाको शवलाई जिल्ला अस्पताल रेउघा ल्याइएको छ । लुटेरा समूहले करिब २ तोला सुन, चाँदीको चवानी माला, करिब १ लाख नगद लुटेको प्रहरीले जनाएको छ । समूहमा आएका लुटेराहरुले बाकस तोडफोड गर्नुका साथै अन्नबाली समेत भूइँमा खन्याएर खानतलास गरेको स्थानीय हरिप्रसाद बुढामगरले बताए । उनीहरुको खोजी जारी रहेको प्रहरी नायव उपरीक्षक चित्रबहादुर गुरुङले जानकारी दिए ।