कोहलपुर माघ १६- लुम्बिनी प्रदेशका मुख्यमन्त्री चेतनारायण आचार्यले आगामी बजेटमा टुक्रे योजनाको प्रचलनलाई निरुत्साहित गर्ने योजना बनाइएको बताएका छन्। नेपालगन्जमा आयोजित नेकपा (एमाले) लुम्बिनी प्रदेश कमिटीको चौथो पूर्ण बैठकलाई सम्बोधन गर्दै उनले यस कदमलाई प्रदेश सरकारको रणनीतिक निर्णयको रूपमा प्रस्तुत गरेका छन्।

मुख्यमन्त्री आचार्यका अनुसार, आगामी बजेटको मुख्य ध्यान ठूला र मझौला योजनामा केन्द्रित हुनेछ, र साना योजनाहरूलाई सीमित गर्ने प्रयास गरिनेछ। उनले भनें, “योजनाहरू छरेर होइन, परिणाममुखी बनाएर जाने सरकारले रणनीति बनाएको छ, यसमा पार्टीको पनि ध्यान जान आवश्यक छ।”

आचार्यले यसरी योजनाको छनोट गर्दा सरकारले संस्थागत प्रक्रियालाई प्राथमिकतामा राख्ने र विकृतिहरूलाई रोक्न सशक्त कदम चाल्ने बताएका छन्। पाँच लाखभन्दा माथिका योजनाहरूलाई प्रतिष्पर्धाबाट कार्यान्वयन गर्ने निर्णय गरिएको र यस कदमले भ्रष्टाचार र अनियमिततिलाई नियन्त्रण गर्ने उद्देश्य राखेको उनले थपे।

बजेट बनाउने क्रममा सरकारले गौरवका योजनामा विशेष ध्यान दिने र आगामी कार्यहरूलाई प्रभावकारी रूपमा अघि बढाउने कुरा पनि मुख्यमन्त्री आचार्यले प्रष्ट पारे। साथै, सरकारको नेतृत्वमा सुशासनलाई प्रमुख प्राथमिकतामा राख्ने योजना रहेको पनि उनले जानकारी दिए।

यस बैठकमा मुख्यमन्त्री आचार्यले प्रदेश सरकारका चलिरहेको कार्यक्रम र भविष्यका योजनाहरूको बारेमा पनि साझा गरे।