कोहलपुर माघ १५- कोहलपुर नगरपालिकामा बुधबारबाट सुरु हुने भोली ८ औँ अन्तर आधारभुत र माद्यामिक मेयर कप रनिङशिल्ड र १७ औँ नगर स्तरीय राष्ट्रपति रनिङशिल्ड खेलकुद छनौट प्रतियोगिताको तयारी पुरा भएको छ । कोहलपुर नगरपालिकाको आयोजना र नगर खेलकुद विकास समिति कोहलपुरको सञ्चालन तथा व्यवस्थापनमा प्रतियोगिता सञ्चालन हुन लागेको हो ।

प्रतियोगिताको विषयमा जानकरी गराउँदै खेलकुद व्यवस्थापन उप–समितिका सदस्य सचिव दिलिप वलीले “प्रतियोगितामा छात्र–छात्रा बराबरीको आधारमा प्रतिस्पर्धा गर्नेछन् । यसले सबैलाई समान अवसर दिनेछ र भविष्यका उत्कृष्ट खेलाडीहरूलाई उजागर गर्ने बाटो खोल्ने बताए ।
कोहलपुर नगरपालिकाले यस प्रतियोगितालाई नगरका खेलकुदका क्षेत्रलाई थप सशक्त बनाउन र विद्यार्थीहरूको शारीरिक र मानसिक विकासमा योगदान पुर्याउनका लागि आयोजना गरेको हो । यस प्रतियोगिताले नगरका विद्यालयहरूको खेलकुद प्रथालाई अझै सशक्त बनाउने विश्वास गरिएको छ ।
साथै, प्रतियोगितामा पुरस्कार राशीको व्यवस्था समेत गरिएको छ । जसमा मावितर्फ पहिलो स्थानको टिमलाई ७५ हजार रुपैयाँ, दोस्रो स्थानलाई ६५ हजार रुपैयाँ र तेस्रो स्थानलाई ५५ हजार रुपैयाँ पुरस्कार राशी प्रदान गरिने छ । यस्तै आधारभूत विद्यालयतर्फ प्रथमलाई २५ हजार,दोस्रो हुनेलाई २० हजार र तृतीय हुनेले १५ हजार पुरस्कार राशी प्राप्त गर्नेछन् ।

नगर खेलकुद विकास समिति अध्यक्ष चक्र क्षेत्रीले प्रतियोगिता आयोजनामा नगरका खेलकुदमा भएको निरन्तर सुधारको उल्लेख गर्दै उनले भने,“हामीले यो प्रतियोगिता आयोजना गरेर, खेलकुदमा नयाँ स्तरको प्रतिस्पर्धा सिर्जना गर्ने प्रयास गरेका छौं । यसले नगरका विद्यार्थीहरूलाई खेलकुदका विभिन्न क्षेत्रमा नयाँ दिशा र उत्साह दिनका लागि मद्दत गर्नेछ” ।

प्रतियोगिता नगरका युवा र विद्यार्थीहरूको खेलकुदमा थप रुचि र लगाव बढाउने विश्वास गरीएको छ । यसबाट खेलकुदको क्षेत्रलाई मात्र होइन, सम्पूर्ण नगरको सामाजिक र सांस्कृतिक विकासमा पनि सकारात्मक प्रभाव पर्नेछ । कोहलपुर नगरपालिका स्तरीय यस खेलकुद प्रतियोगिता आगामी दिनहरूमा नगरका खेलकुदमा नयाँ अध्याय थप्ने विश्वास गरिएको छ ।

कोहलपुर नगरपालिकाका सामाजिक विकास समिति संयोजक इश्वरी प्रसाद विकले प्रतियोगिताको उद्देश्य र महत्व बारे चर्चा गर्दै, “स्वास्थ्यका लागि खेलकुद, राष्ट्रका लागि खेलकुद भन्ने मुल नारालाई ध्यानमा राखेर यो प्रतियोगिता आयोजना गर्न लागेको जानकारी दिए । यसले विद्यार्थीहरूमा शारीरिक र मानसिक विकासको अवसर प्रदान गर्नेछ भने, खेलकुदको महत्वलाई प्रकट गर्ने उद्देश्य पनि राखिएको छ । प्रतियोगिताको कोहलपुर नगरपालिका नगरप्रमुख पूर्ण प्रसाद आचार्यले उद्घाटन गर्ने कार्यक्रम रहेको छ ।
प्रतियोगिता विभिन्न खेल विधामा हुनेछ र यसबाट नयाँ खेल प्रतिभाहरूको पहिचान गर्ने अवसर मिल्नेछ । यस वर्ष चेस गेमलाई पनि प्रथामिकता दिइएको छ, जसमा छात्र–छात्रा गरी १० जना प्रतिस्पर्धा गर्नेछन् । चेस खेलले मानसिक क्षमताको परिक्षा लिनका लागि एक उत्कृष्ट माध्यम बन्ने विश्वास आयोजकहरूले व्यक्त गरेका छन् ।